2017年8月2日

以為高鐵貴?高處未算高

日前講起高鐵香港段平均造價32.46億港元/公里,高過日本中央新幹線的14.38億港元/公里,很多網民話貴。好貴呀何?未算呀。香港政府和工程界在創造工程奇蹟 (價格方面) 真是世界第一無人能比。講的就是昨日親共派陳健波在電台節目左右乜乜乜上面,又譴責民主派拉布搞到n個項目通過不到,的其中一項,中九龍幹線。

這條中九龍幹線會建一條隧道連接西九和啟德,全長4.7公里,造價424億,是90.21億元/公里,是高鐵香港段的2.78倍,中央新幹線的6.27倍。再換個講法,它的長度只有高鐵香港段的18%,造價卻是50%。走線圖在下面。

高鐵就話冇左會令香港邊緣化、威尼斯化云云,所以要花844億.......不對當初通過時高鐵造價只是650億。那麼不起這條中九龍幹線又會搞到香港點呢?要成424億,半條高鐵咁貴喎。會是「半邊緣化」?「熱那亞化」?「呂貝克化」?定乜化呢?總之,成半條高鐵咁貴,肯肯定是有超級無敵重要的用途,不過可能我「唔化」,看不透為何花424億起一條隧道咁大把是理所當然,不起就要被你班親共派譴責,搞到經濟民生幾大影響,工程界幾多人冇飯開,香港經濟又陸沉又被深圳追過云云,囉。




其實龍門真是任佢搬。中共當年說新機場是大白象會香港破產車毀人亡,現在又說不起大白象會香港破產車毀人亡。當年就叫立法會審批大白象嚴謹些,現在就變成通過大白象越多越好,批出的錢越多越好,審批時間越短越好。但又要指明喎,是大白象才是這樣喎,公立醫院的話 budget 是越 cut 越好架。另一個搬龍門,青年人上街要政府怎樣怎樣就是廢青,自私,唔識獅子山精神,工程界叫立法會乜都唔好問,家陣打劫,同我即刻比幾千億黎,就是為大家好香港好。

我想以後小朋友向阿媽拿錢,或者下屬向上司 claim 錢,可以用這些對白:

「你今次審批的錢少過上次,係好唔負責任,通過的項目梗係越多越好」

「你做咩咁多臨時問題,用的時間多左好多呀。我唔比你再問,即使同我舉手通過下」

「你有冇聽過乘數效應,我洗每一分錢都可以帶動經濟改善民生,對gdp有貢獻架」

「知唔知依單野關係到幾人飯碗呀,你試下唔批錢丫娜」

「我唔比你發言發問,係我過去太寬鬆太講道理,依家執正黎做」

「我希望你理性d,唔好問咁多野又規程問題,我比咩你你就通過,先係履行職責囉」

「簽名譴責我呀?唔會有意義囉,同埋我唔驚架」

沒有留言:

張貼留言