2018年7月30日

研究:文言文範文充滿負能量

香港年輕人充滿負能量,有論者怪通識,有人怪冇史讀,筆者研究就發現可能是跟中文科有關。仔細閱讀,可以發現中文科範文,尤其是文言文,內容多涉自命清高、懷才不遇、借事諷今、唉聲嘆氣,非常負能量。為何不可以正能量面對被貶官、被流放、和國破家亡?比較正能量的例子只有教人接受住劏房現實的《陋室銘》等少數。還有問題就是泛政治化,連去個旅行寫個遊記都可以牽涉政治。當局實應檢討一下。以下為一些例子:

《曹劌論戰》食肉得罪你呀?素食者真係好負能量
《廉頗藺相如列傳》請罪咪請罪,做咩要自殘?教壞細路
《出師表》成日話危急存亡之秋,不如話蜀漢最黑暗一日?

《歸去來辭並序》打工好辛苦咩?正廢青
《春曉》打風淨係諗到花落,唔可以係雨水滋潤大地既
《清明》掃墓一定要欲斷魂架咩?唔可以興高彩烈既?
《登樂遊原》睇夕陽都可以諗到只是近黃昏,負能量
《八陣圖》點解係要「遺憾」失吞吳?唔可以正面D既?
《黃鶴樓》黃鶴樓冇黃鶴好失禮你咩?菠蘿包夠冇菠蘿啦
《送元二使安西》西出陽關無故人又點?唔可以識新朋友既?依D咪叫唔肯走出 comfort zone 囉
《始得西山宴遊記》做咩要加咁多政治意味?唔專心做旅行KOL?
《岳陽樓記》點解唔可以先天下之樂?要逼自己充滿負能量?
《六國論》中國大一統唔好咩?做咩要阻住秦國統一?
《水調歌頭》成個感覺都好負面,聽得出作者唉聲嘆氣
《聲聲慢》淨係讀出黎個聲音都已經超級負能量
《虞美人》換左老細啦,仲掛住回首故國
《滿江紅》鼓吹暴力

2018年7月28日

讀三國千祈唔好讀過龍

聽講一哥叫人讀三國演義。讀三國夠架啦,千祈唔好讀埋晉朝。晉國280年統一三國,311年就五胡亂華洛陽淪陷玩完。明明GDP第一、大一統、不搞民主自由、不硬搬西方一套、領導人終身制,結果仲弱雞過三國分裂時是但一國。蜀國都捱到42年呀大佬。

不過就算淨係讀三國,都要小心唔好讀過龍,睇透以下幾點:

1. 中國人自古最中意內鬥。由十八路諸侯倒董,袁氏三兄弟死到臨頭,到蜀吳合作失敗都係。爭權、爭功、爭上位、爭捉鬼,永無間斷。

2. 投降派又係歷來都多。無論孫權軍 (周郎除外)、劉表軍、劉璋軍,你講得出都係。最經典應屬張松,唔止騎牛搵馬,仲送埋攻略畀未來老細,簡直人板。

3. 閹人又係多。開頭有十常侍,後尾有黃皓。好多人為攀附權貴不知幾樂意做閹人。

4. 而且多數老闆都中意用閹人。親小人,遠賢臣,何止後漢先係?

5. 精明老闆,到老都多有糊塗。曹劉孫邊個走得甩?

6. 奸角上位容易,忠角多捱到死。有D人唔知點解一出場就已經係高官,相反趙雲之流真係捱左不知幾耐先升到高位。

7. 跟老細跟得耐都唔擔保可以平安退休。望下荀彧。

8. 官二代富二代又係有優勢。靠家姐妹妹嫁個有錢人又得。何進是也。

9. 人無完人,叻如諸葛亮司馬懿都有失算之時。所以有D人舊時成功過一次就成日吹威水史,sorry一次成功唔代表你以後次次都岩。


10. 躬耕於南陽不求出位的宅男可能先係叻人,相反一日到黑認小學考第一果D......正是有能力又唔出黎,冇能力又爭住做。

11 宣一次誓就跟足一世,得關二哥做到。不過就算關二哥都試過信錯 fake news 上錯賊船,轉過老細一段時間。

12. 延伸去諗,有D人宣過誓效忠事頭婆,跟住又宣誓效忠共產黨,可能臨尾就香都係會領返英國護照安心D。即係D犯婦人呀,薑溶呀,大口狗果D呢。


13. 勿以為投降輸一半當冇事,好多諸侯投左降跟住都冇咩好收場。

14. 蜀國只一省分裂勢力,卻是天府之國,經濟文化發展蓬勃,如非掛住反攻大陸耗損人力可能捱得仲耐。


15. 分久必合,合久亦必分。國家好似好威,轉頭又可成空。魏滅漢、晉滅魏、五胡亂華。咩叫正統政府,自古以來乜乜乜,唔好太認真。

ps 搞社運溝女可能真係有,你睇劉備老婆有增無減。

2018年7月23日

再陷政治危機 May姐仍有望脫險

文章已在《am730》刊出
https://www.am730.com.hk/news/%E6%96%B0%E8%81%9E/%E8%A7%80%E5%AF%9F%E5%86%8D%E9%99%B7%E6%94%BF%E6%B2%BB%E5%8D%B1%E6%A9%9F-may%E5%A7%90%E4%BB%8D%E6%9C%89%E6%9C%9B%E8%84%AB%E9%9A%AA-133441


英國首相「May姐」文翠珊再次面對政治危機,支持「硬脫歐」的脫歐大臣戴德偉和外交大臣約翰遜先後辭職,以示不滿May姐的「軟脫歐」方案,令外界憂慮硬脫歐派會藉機發難向May姐逼宮,英國會陷入政治混亂。筆者倒是持相反意見,或者應該說,我一路以來都是一個意見,就是在脫歐談判這個燙手山芋解決之前,都不會有人向May姐逼宮,不然取代她做首相都是搵自己笨。

看回時間表,May姐是在2017年3月正式向歐盟遞信申請退出,而歐盟條款列明,除非屆時歐盟成員國一致贊成押後,申請國在最遲2年內就要完全退出歐盟,即是英國須在2019年3月前傾完脫歐安排。如果限期前無法傾完,最壞情況就是「最硬脫歐」,即時間一到就自動中斷英歐之間所有合作關係。雖然有「硬脫歐派」政客聲稱這樣也沒所謂,但稍為腦袋正常一點的人都會明白這只會造成政治、經濟、社會混亂,必須避免。

也就是說,就算硬脫歐派政客如約翰遜成功向May姐逼宮取代之,因他要求跟May姐不同的脫歐安排,他上台後必須改掉所有內容重新談判,而且須在半年內完成,這根本是不可能的任務。這麼一來,「最硬脫歐」就會在他任內出現,他勢將成為英國史上最臭名遠播首相之一,屆時也會被逼下台。沒有人會想做一個註定失敗和短命的首相吧?所以我的意見是硬脫歐派不會立即向May姐逼宮,至少都會等到她完成脫歐程序,May姐尚可做多至少半年。

另一個方向去想,是就算真的現在挑戰May姐,成數有幾高?May姐看似弱勢,民望不高,黨內內鬥不斷,執政黨在國會也沒有過半數,須依賴北愛民主統一黨的票維持政權,可這不代表硬脫歐派能輕易勝出。的確,只要硬脫歐派發動叛變,May姐就要倒台,但始終保守黨內軟脫歐派人數更多,就算重選黨魁,硬脫歐派亦可能會輸,到時更冇面。保守黨內亂,也可能讓工黨漁人得利。所以硬脫歐派向May姐逼宮前尚有很多計算要做。

那麼約翰遜和戴德偉現在辭職是做甚麼呢?最大可能是為自己保存硬脫歐形象,以及跟May姐保持距離,萬一May姐的談判結果是各方都不滿的,到時就有立場大肆批判一番,再發動逼宮了。如果一路不辭職,跟May姐坐同一條船,又同意她的軟脫歐方案,將來就難有立場挑戰她了。何況兩人現在在政府中的表現也麻麻,不辭職做下去實在無甚加分。

對May姐來說,則可謂有危又有機。今次的辭職潮,短期內是會令她的弱勢形象更加弱勢,但如果可以捱過不被逼宮,之後又成功談判出一份民意可接受的軟脫歐方案,反而可以鞏固她在軟脫歐派中的地位,以及削弱硬脫歐派的氣焰,令兩派都無人有意挑戰她,增加自己繼續做首相的機會。這個情況未免太樂觀,不過是有可能的,亦應該是May姐現在的目標。

以下補充,講了這麼久硬脫歐軟脫歐,到底是甚麼呢?簡單來說就是要跟歐盟維持幾多合作關係的分別。作為歐盟成員國,現在英國跟歐盟組成自由貿易區,商貿相關法律和監管都保持一致,歐盟其他國民可自由在英國定居 (反之亦然),亦要接受歐洲議會和法院在相關方面的制約。魚與熊掌,不可兼得,歐盟就講明,英國脫歐後不可能又留在自貿區又減少制約這麼便宜,潛台詞是咁著數豈不是每個成員國都隨時可以脫離?

硬脫歐派想優先減少歐盟制約和移民,必要時退出自貿區,軟脫歐派則想優先留在自貿區,必要時接受部分制約和讓已經定居的移民留下。脫離自貿區,勢必對英國經濟造成衝擊 (英歐貿易佔英國整體貿易一半),為了減少歐盟制約和移民,是否值得呢?受歐盟法律制約,主要是概念上的,對一般市民日常生活其實影響不大,而移民方面,別忘了歐盟移民只是移民的一部分,來自亞非的移民是完全另一件事。

看回國際環境,以往硬脫歐派聲稱脫歐後可以跟其他國家簽自貿協定,令英國經濟更多元發展。但現在特朗普搞美國優先和貿易戰,歐洲跟中俄關係也不好,英國脫歐真的可以跟其他國家發展商貿?退出自貿區還有個關連問題,就是會令北愛爾蘭和南愛爾蘭恢復邊境管制,因兩地會從一致的商貿法律變成不一致。北愛、南愛、歐盟都表明不接受,即是逼英國選軟脫歐。這些都是令英國,特別是May姐政府,選擇軟脫歐方案的考慮。

2018年7月17日

正能量看貿易戰


中美貿易戰一觸即發,筆者認為,在這危急存亡之秋,最緊要保持淡定,保持正能量。只要心懷香港精神、高唱獅子山下,以正能量面對、定可渡過難關。近日港府官員接連批評侵侵,我覺得一味 complain complain complain,不夠正能量。香港是商業城市,不搞政治,也不是國家,沒有外交,我認為政府內外都不應牽涉太多政治。

眾所周知,在香港地,可以上位、發達、貢獻社會,決定性的無非只有一個因素,就是你自己。只要你有實力、夠努力,一定可以上位發達。相反,失敗者,只可以怪自己唔夠實力和勤力,千萬不可怪甚麼政治因素、社會環境、國際競爭。怪自己以外因素,鬧貿易戰,是讀屎片港獨廢青、被佔中釋放的獸性影響才會做,千萬要不得。

就算貿易戰開打,只要保持正能量,繼續憑實力和努力,一定不會有問題。會丟工作、公司蝕錢甚至倒閉,肯定是不夠實力和努力,只可怪自己,不可怨貿易戰。保持正能量,看其他人如何在貿易戰下都可以賺錢,才是正道。香港背靠祖國,有大灣區和一帶一路,佔盡天時地利人和,只要抓緊機遇和保持正能量,必定萬事冇事。

為此,政府不但要鼓勵年輕人走出去,亦應該鼓勵中年人、老年人走出去。一味做甚麼再培訓、終身學習、低收入津貼是不夠的。應該多發展「中港帶路」中老年人民心互通,設基金資助中老年人到「中港帶路」培訓學習,低收入津貼和創業基金亦應包括整個「中港帶路」,協助中老年人走出去,抓緊大灣區和一帶一路機遇。

筆者還看到有分析員說,貿易戰開打,股市樓市最壞情況跌三成。用個「壞」字,好負能量。為何不調轉看,股市跌三成,是入市良機,樓市跌三成,雖然大部分市民仍是買不起,但至少都是多了人買得起。半杯水,有人說是還有半杯,有人說只剩半杯。觀點與角度,有危就有機,面對貿易戰,記得保持正能量。

---認同請分享---

2018年7月14日

炸左佢再起過 哥倫比亞都識梁愛詩

截圖自BBC報道
https://www.bbc.com/news/av/world-latin-america-44802768/colombia-s-tragedy-road-bridge-demolished

「不如炸左佢再起過!」梁愛詩當日提出的高鐵西九站問題解決方案,如今竟在地球另一端實現。講緊是外媒報道,哥倫比亞一條興建中的大橋因年初發生工業意外,調查後發現設計和安全有問題,當局唔係「洗濕個頭」就幾歹都要起落去,而係一於炸左佢再起過。

諗落,梁愛詩方案其實有不少好處。例如,炸左佢再起過,即是要長一倍時間去起,工人就可以繼續有工開,工程界又多一倍市民血汗錢呃,無能官員又多一倍可以貪落袋。如果可以早日決定揮淚炸大橋,亦都可以免去用特權法調查的需要,議會唔需要搞太多政治,相關公司唔會造成好大滋擾。一句到尾,馬時亨你O唔OK?你話OK就OK架啦。

2018年7月11日

深圳高球會結業 豈有此理

筆者日前看到一篇新聞報道,說深圳有高球會結業,引發苦主在涂謹申帶領下遊行到中聯辦要求介入,起初我是不相信的。大灣區滿布機遇,遍地黃金,做生意有賺冇賠,人人都發過豬頭,點可能有高球會結業呢?而更匪夷所思的,係依班苦主竟然係搵涂謹申鳴冤,跟住涂謹申又走去要求中聯辦介入添。點睇都係 fake news 啦下話。

再想一層,都唔係冇可能,除非個經營者同班苦主係廢青。大灣區發展咁好的機會都抓唔緊的,除左冇競爭力、唔肯學普通話的港獨廢青仲會係咩人?而根據「搵錢交稅買樓=對社會有貢獻」的香港特殊相對論,依班做生意蝕錢的人肯定係對社會冇貢獻的人渣敗類拆白黨死飛仔,唔排除佢地將來仲會在中聯辦門口瞓街抗議,順便溝女。

但更令我覺得豈有此理的,係深圳政府對高球會結業竟然沒有伸出援手。高球會對一個城市發展係幾咁重要,深圳政府到底諗乜?娜唔好話咩深圳仲有其他高球會,或者依家大灣區一小時生活圈去遠少少都得呀。阿水都知高球會係地位象徵,亦係商界秘交之地,仲可以培育世界級運動高手,神聖不可侵犯,冇左就 this city will be dying,經濟社會市民健康同時崩潰被深圳追過玩L完云云,一個都不能少架嘛。


再睇多次報道以確認我冇睇錯,報道竟然話高球會結業係因位處水塘隔離,深圳政府勒令要恢復成郊野公園。要郊野公園都唔要高球會?你個深圳政府真係蠢過隻豬,定係全心整死深圳?你望下香港,正確之選梗係要高球會唔要郊野公園架嘛。深圳簡直倒行逆施,違反人類常理,天地不容。另一篇報道話唔止依個,另一個高球會都面臨被深圳政府徵地拎黎再規劃。我直頭怒髮衝冠憑欄處,咒罵佢黃天擊殺死全家。

2018年7月4日

只許州官英國護照 不許百姓英文提問

早排「特金會」已經慨嘆過,政府同親中派自己冇國際視野,將香港由「國際都會」降格成「大灣區城市」,依家又要嘆多次了。咪因為林鄭話講英文「餵屎貪」(waste time) 囉。

其實眾所周知,香港好多外國人或前外國人定居架嘛,例如林鄭佢屋企人啦,Package Lau、陳智思、陳啟宗、梁君彥、薑融啦,仲有「范婦人」同「豬姐」等等,多不勝數,未能盡錄。唔用英文,略有歧視之嫌囉。

就算唔講係咪歧視,我怕開左個頭講英文係「餵屎貪」,遲D印英文文件係唔環保,路牌印英文係晒位,地鐵英文廣播又"ar"時間,請英國法官又晒人工,甚至學校英文堂都係「餵屎貪」。反正親中派咁唔中意英國法官,正好藉機將佢地炒魷。政府咁中意洗我地香港細路的腦,一於將英文堂改晒做習思想堂。

有朋友問,如果CCTV記者要林鄭用普通話又係咪「餵屎貪」。咁就梗係唔係啦。時代唔同嘛,轉左老細嘛,「國際都會」變左「大灣區城市」嘛。以前殖民地時代,識英文唔識中文就係高等華人,依家變左識普通話唔識廣東話至係高等嘛。我估林鄭遲早話用廣東話係「餵屎貪」,索性全部答問用普通話,等習總開CCTV時聽得到嘛。

我仲諗到一招,就係出動張建宗。皆因張建宗的普通話同廣東話係一樣的,出動佢就可以同時滿足晒普通話同廣東話記者了,幾方便呢。不過學某電視台記者話齋,政府同親中派唔好講咁多廢話就最唔「餵屎貪」了。