我撐英國留歐

估唔到會在FB上看到一些從來不談歐洲事的人，話支持脫歐。我就絕對支持留歐。唔該唔好將大陸對香港，代入歐盟對英國。

歐盟係由28個民主國家組成，冇一個係極權國家，亦冇一個國家可以以一蝦廿七。將歐盟同共產黨、法西斯、希特拉云云比，我唔知點解比得到。好多人話德國話晒事。德國只是最有發言權和影響力，實際上任何重大決策都需要所有成員國一齊投票決定，任何成員國在必要時亦都可以行使否決權。德國總理默克爾提出的難民配額制，由於太少國家肯做，其實至今都未真係落實到。英國無須用歐元、無須加入神根公約、又有會費折扣，話歐盟一味硬質野比英國食，根本同事實不符。

好多人又聽英國人講，話布魯塞爾的一小撮人控制左英國，依個描述絕對不正確。首先上面已經舉左幾個例子係英國唔洗硬食歐盟D決定。而歐盟的決策過程，簡單地講，大致有4關 (雖然應該冇人睇完依段野會覺得簡單)。第一關係由28個成員國領袖組成的峰會決定大方向，依D領袖都是民選產生，英國首相亦包括在內。第二關是由歐盟的行政部「歐盟委員會」撰寫政策和法案細節，依個委員會經常被批評不是直選產生，這是真的，但委員會的28個部長係由28國政府提名，每一國分到一個部長，英國都有代表在委員會內。第三關是由28國政府的相關部長們確認委員會撰寫的政策和法案，當然這又係包括左英國政府在內。第四關係由歐洲議會表決，議會係由全體歐盟國民直選產生，當中有多達73席係由英國人直選出來。所以總括來講，我們可以話歐盟架構複雜，一般人難以直接影響其決定，但這同「布魯塞爾的一小撮人控制英國」是完全不同。而事實係英國政府在歐盟決策的每一層都獲知會和可以參與。

有D人又話英國留在歐盟就要收中東難民，這是大錯特錯。英國並非神根公約成員，有晒海關和邊防，非歐盟國民的人不能自出自入，亦無權定居。英國亦冇加入難民配額制，收的難民是國內左膠要求政府自願收的，並非歐盟或默克爾的命令。所以留歐脫歐同難民根本無大關係，只會影響到來自歐盟國家的移民。然後，歐盟移民去英國，同中國移民黎香港，係冇得比囉，你拎歐洲人同中國人比？

到經濟。有D人話脫歐後英國更大彈性選舉同邊個做生意云云。但好簡單，歐盟係世界最大經濟體，亦都同英國地理上最近，唔同歐盟做生意同邊個做？美加澳紐，一向做開生意架啦，脫歐後唔會突然多左囉。非洲同拉美？好多係法國、西班牙、葡萄牙殖民地，在歐盟之內反而更有利同佢地打交道。淨低最大的市場，咪中國囉，逼事頭婆招呼習總多幾次囉，D英國政客絕對做得出架。而且脫離左歐盟，估下英國同其他國家傾 deal 的 bargaining power 會大左定細左？不論左中右的專家，冇9成都有8成，係認為脫歐後英國經濟會差左。唔好比香港班五毛藍絲洗腦，成日話歐洲破左產有咩生意好做，爛船都有三斤釘，唔係你估點解李超人由大陸撤資之後，係撤晒去歐洲呀？

又有人話，脫歐後都可以繼續同歐盟做生意，再傾過D條件者。well，根據瑞士、挪威、冰島等的經驗，同歐盟組成自貿區就要接受一大堆歐盟政策同法律，其實同加入歐盟差別唔係咁大。瑞士兩年前公投通過限制歐盟移民數目，實行唔到，點解？因為歐盟話唔得囉。以為脫歐就唔洗聽歐盟支笛？咪傻啦，更加唔比面你呀。如果英國真係反面脫歐之後又話要傾生意，肯定睬你都傻。

最後，比班反移民的人控制左英國，慌會比你香港人入英？