事頭婆唔退休 英國咪冇退休年齡？

特區政府將長者綜援領取年齡調高至65歲，特首林鄭話是因為香港人變長命，工作和退休年齡延長，又以自己60幾歲仍每日工作十幾小時為例，說明措施冇咩野。筆者一聽到就諗，阿頭做到幾歲下面就要做到幾歲，咁長和、恆基、澳娛/澳博、TVB (以前) 的打工仔就死啦，個個唔做到8-90甚至100歲都唔得。再諗遠一點，事頭婆話唔會退休要做到死，咁英國咪全國人唔比退休？

筆者成日比人話個樣後生，有人就會加把口話我唔洗捱，咁我點都唔夠林鄭唔洗捱。林鄭話自己一日工作十幾小時，唔知係咪計埋去西環聽柯打、坐飛機上京覲見習總、去珠西考察大灣區、同政黨/富豪酒會飲飲食食嘻嘻哈哈咁呢？做老細仲有樣好就係可以自己改自己工作範圍，例如英文記者提問就唔洗答、邊D議員就問題太無聊唔洗見、邊D政府委員會報告同我諗法不符就掟埋一邊。仲有林鄭生活上都係唔洗捱。眾所周知，佢N年黎都係有AM車接送同官邸住架嘛，唔係點會廿年前面世的八達通都唔曉用，或者唔識自己買廁紙呢？咁樣做到70歲，我都冇問題呀，不過一般打工仔女唔係囉。

唔知點解老細都中意用自己角度睇人，或者話當年自己點點點。好似廿蚊張話自己老婆當年大肚冇侍產假咁，張太大肚時返緊咩工我就唔知 (我只知張太做過小學校長，因為我讀果間小學)，但我斷估佢唔係做緊酒樓侍應或者廚房洗碗依類辛苦工掛？同埋當年點依家就要點架拿？學人話齋，古代人夠冇冷氣冇電腦冇汽車，你依家又要用？當然再極品的就有 Package Lau，教人去少幾次日本就買到樓，唔知佢去一次日本係咪要洗一百萬，我去就洗一萬零架啫，去少一百次都未買到樓囉。好在賭王就唔會周圍鼓勵人要有多D紅顏知己。

講返綜援。壽命變長，退休延長，醫療福利開支增加，的確係全世界國家都面對緊的問題，香港人亦遲早要思考「人生100年」(日本近年流行語) 要點分配使用。但不同係，香港本身福利唔多，盈餘就勁多，根本冇人明邊度黎咁大財政壓力要節省開支。要說服人，唔係用一句「我都60幾都仲返緊工」就得囉，唔該用多D理據好冇？咁當然我都知林鄭一向唔係以理服人，係「我話OK就OK」，即係好似佢唔知點樣就知道填海係最佳選項，又唔知點樣就知道填海獲得多數市民支持，可能又係神話比佢聽啦 (即係幻聽)。一萬億丟落海就濕濕碎，長者定一般綜援爭果幾舊水婆乸數就計到盡，林鄭開頭成日講咩管治新風格，睇到啦。