2018年10月5日

講起我就扯火

陳凱欣參選,有識得佢的人send一段短訊來,話咩佢都係打份工,想細路生活過得好啲啫,唔洗對佢咁harsh嘅。真係睇到我扯火。

1. 依份唔係一般工,係會有份決定係咪洗腦教育、23條立法、一萬億丟落海起人工島,影響全香港市民架。你咁關心佢細路有更好生活,就唔關心全港細路有更壞未來,係咪醫院調轉左,其實佢啲細路係你生架?btw佢份糧係你同我有份出架 (稅金)。

2. 工有好多種,佢大把其他工揀,一樣可以比到佢細路更好生活。佢揀得加入建制派依條路,就自然有人會鬧。btw其實當年紐倫堡/東京大審判都好多人自辯話自己只係打份工架咋。一陣佢話六四鎮壓正確、習總偉光正,都係搵食啫,犯法呀?

3. 你班邪惡的大人唔好自己貪慕虛榮、攀附權貴、發錢寒就借啲細路過橋好嗎?唔係個個細路都中意收10萬蚊現金做生日禮物,數銀紙就可以高潮架。家陣唔係佢唔做依份工啲細路就冇飯食呀,可能年中食少幾餐牛扒咋。好多細路更想父母多啲時間陪自己囉。

講到底,你同佢有幾熟呀,咪頂多係舊同事?又話咩我後生份人熱血,我就話係中國人性格鄉愿。早排先有美國新聞,有個共和黨國會議員因為支持特朗普同發表極右言論,6個兄弟姊妹登廣告宣布同佢斷絕關係,仲為民主黨拍廣告同佢打對台。年紀差異?文化差異。

https://www.youtube.com/watch?v=IZuayQFD51w

1 則留言: