有咁的老細真係唔識笑 II

看完昨天的特首選舉論壇，對三位候選人又加深了了解。

筆者上次文章講過「話人返工得閒，潛台詞就係話人懶啦，即係佢又係果d認為上 fb 就係懶人廢青果類老細。甚至仲衰，因為你識同人溝通又係懶人廢青，人緣好又係懶人廢青，準時放工又係懶人廢青，甚至可能放 lunch 出街食又係懶人廢青。」

之後睇報紙，話林鄭當年升做社署署長，新同事話咁開心不如食 tea 啦，結果張落單紙傳到林鄭時，佢張張紙撕開兩半。Lunch 出街食就唔知，但食 tea 就肯肯定被林鄭視為懶人廢青。

尋日佢又有新招，話鬍鬚曾檯面好乾淨冇咩文件，於是檯面乾淨冇文件又係死罪。咁我相信林鄭會認為馬時亨係勤力叻仔，因為當年「仙股」事件，馬時亨話過自己檯頭文件疊到「成坐山咁」先睇唔晒文件。

跟住佢解釋自己點解咁少前AO撐，係因為佢去開的AO飯局係鬍鬚葉劉都去，唔想搞一場選舉撕裂左。但鬍鬚葉劉身邊真係成班AO幫手wor。我從常理睇啦，一係去果個飯局的人好少，二係林鄭除左果個飯局之外就好少同人溝通。講真返工總有同事熟D同冇咁熟，唔一定大圍飯聚先有偈傾架嘛，不過有D人就會視之為「結黨營私」，又係罪狀囉。

睇網媒報道，又話尋日林鄭連講廢話都咁多人鼓掌，乃因佢嫌以前去論壇時少人鼓掌，所以老細講野下屬唔拍掌歡呼又係死罪。我相信林鄭遲早又會加多項新罪行：老細問台下問題時台下冇人問問題。

題外話，依家政府搵左郵政署長丁葉燕薇做候任特首辦秘書長，有同事就話應該搵埋陳甘美華，我就話陣間D人以為係影分身，認唔出邊個係林鄭咁點算。