鬍鬚輸比林鄭最能暴露荒謬

最近民主派紛紛就特首選戰提出意見，有人說要派人參選當面拆穿選舉荒謬，有人說要投白票抗議，有人說要「造王」選個破壞力最小的建制派。昨天我看新聞見到葉劉哽咽說上頭封殺她對她不公允，就忽發奇想：

讓高民望的鬍鬚入閘後輸給低民望的林鄭，不就最能暴露特首選舉的荒謬？

有些人講，你們香港人特別是民主派，不要成日反中亂港，多點跟中央溝通，中央就會放心給你民主給你加入政府的啦。只要符合中央的「愛國愛港、有管治能力、中央信任、港人擁護」四大條件，特首都有得你做。

那現在看看曾俊華，獲中央委任2次做了9年財政司，是民望最高的候選人，都不符合「愛國愛港、有管治能力、中央信任、港人擁護」的條件喎。財政司都不夠管治能力和中央信任？最高民望都不叫港人擁護？咁點先算呀？

不然再看看曾鈺成，追隨中共 (還可能入了黨) 半個世紀，兄弟因此坐過監，是全香港最根正苗紅人士之一，做過8年立法會主席，長期是民望最高議員，都不符合「愛國愛港、有管治能力、中央信任、港人擁護」的條件喎。

葉劉亦都不用多講有幾愛國愛港啦，雖然「港人擁護」就似乎沒有。

總之，唔好再講咩唔好反中亂港，多啲同中央溝通啦，以上三個人跟左共產黨咁多年，都冇得選特首呀。有咩比依個情景更能暴露特首選舉荒謬？中央唔知點解，用咩條件考慮，欽點左個人，就係佢架啦。至少我覺得比長毛參選特首暴露到更多荒謬囉。

如果要咁玩，民主派唔洗同曾俊華傾咩政綱，就送佢入閘。到時這個人，做過9年財政司，沒加入過民主派政黨，港獨、自決、普選、取消功能組別、平反六四、建設民主中國......一句民主派的主張都沒講過，都選唔到，包你所有溫和／溝通路線的香港人都心死。