做左40年官定intern/trainee

有時真係唔知好笑定點，香港班官講野咁黑色幽默。林鄭同張建宗，兩個夾埋就黎做左成個世紀官的人，講話仲學習緊點做官。咁唔怪得之要押後退休年齡啦，因為做左成世官都未學識，到退休果日仲係intern/trainee。試諗下港鐵出事，班工程佬話「我仲要學習點做工程」，公院醫死人，醫生話「我仲要學習點醫人」，膠法官亂判案被上面駁回，跟住話「我仲要學習點審人」，過唔過到骨？班五毛話比時間/機會林鄭，好似比左40年啦，仲要比多幾多？無間道都係十年又十年，冇四十年又四十年架，除左有120歲的羅致光。又唔見話比機會/時間港獨青年。

睇返佢兩個講仲有咩要學，又係好得意。張建宗話要加強政策局間溝通，加強同政黨溝通，要從市民角度作「現實測試」。以前有前輩教落，官員講野要調轉黎睇，話依家要做乜乜乜，就即係以前冇做到乜乜乜，例如習總強調解放軍要做到「戰之必勝」，即係依家未做到啦。所以張建宗咁講，就即係以前政策局間係冇溝通，政府同政黨係冇溝通，政策唔係從市民角度出發，係做緊「非現實測試」(whatever that means)。咁樣逆向思想一下，我就直頭驚啦，原來你做左40年官都係唔同人溝通，唔從市民角度出發，做「非現實測試」架？喂當日你同林鄭上台，傳統泛民話你地好識溝通格？突然比返晒先生呀？

林鄭呢，就話要學習謙卑，唔要精英主義，咁即係話自己以往唔謙卑同精英主義啦。我就試下代入佢角色，以前佢見到其他人時心裡面OS係點樣藐人，例如：「唓依條友都唔係小學考第一」「唓依條友都唔係讀港大」「唓依條友都唔係一考AO就中」。咁我就好有興趣知佢以往係點睇曾蔭權啦，因為眾所周知佢冇讀大學，係考左入政府之後先去哈佛take個碩士course架嘛。但佢點睇曾俊華依個MIT畢業生呢，我地就知啦，因為佢自爆過「佢檯面乜都冇 (i.e.都唔知係咪冇野做)」「成日上FB同市民溝通 (i.e.係咪吞緊pok)」。佢見到老董，可能心裡又藐人「超，二世祖死好命，唔係有大陸照顧你晨早破左產啦」。

附錄：現屆政府主要官員出任官員/公職人員時間：
林鄭月娥 1980年加入AO職系
張建宗 1972年加入新聞處，1979年轉入AO職系
陳茂波 2008年當選立法會議員，2012年出任局長
鄭若驊 2018年出任司長，之前多次出任公職
黃錦星 2012年出任局長
楊偉雄 2015年出任局長
劉江華 1996年當選臨立會成員，2012年出任副局長
劉怡翔 1979年加入AO職系
羅致光 1995年當選立法局議員，多次出任公職，2017年出任局長
李家超 1977年考入警隊，2007年升至助理處長，2012年出任副局長
陳帆 1982年加入政府做工程師，2009年升至副署長，2017年出任局長
陳肇始 2012年出任副局長
羅智光 (公務員) 1980年加入AO職系
邱騰華1981年加入AO職系
黃偉綸1985年加入AO職系
楊潤雄1992年加入AO職系
聶德權1986年加入AO職系

多得白鴿大腦 老嘢基層唔撐 林鄭呢鑊hihi了

	11月支持率	11月反對率	1月支持率	1月反對率
18-29歲	11%	80%	22%	67%
30-49歲	41%	44%	29%	55%
50歲以上	50%	32%	37%	45%
小學程度	53%	26%	38%	42%
中學程度	43%	39%	32%	52%
大專程度	29%	62%	29%	57%
Overall	40%	44%	32%	52%

港大民調，林鄭民調創新低。港大民研有時會在附錄提供年齡別/教育程度別的支持度，今次有提供，對上一次提供係11月。對比之下可以看到，林鄭民望下跌源於老年人，因為他在年輕人間的支持度本來已經低無可低。

11月時，林鄭在30至49歲人士間的淨支持度 (支持減反對差異) 為負3%，最新一次擴大至負26%。50歲以上人士間的淨支持度，11月還高達正18%，最新跌至負8%。教育程度方面，中學程度人士間的林鄭淨支持度，11月還有正4%，最新已仆至負20%。小學程度人士間，11月高達正27%，最新是負4%。

今次民調，不論所有年輕層和教育程度，林鄭的淨支持度都是負的，連老嘢同基層都反了，林鄭呢鑊仲唔hihi？當日話過架，「如果香港人的主流意見認為我無辦法擔任行政長官，我係會辭職」，唔好走數呀。

最後，所以我話，白鴿大腦去左林鄭度係應該開香檳慶祝架啦，睇下一單長者綜援搞成點。佢仲慌死激唔夠人，加多個「象徵式懲罰」扣兩舊水。林鄭下台，可能要多謝白鴿大腦。我開始懷疑佢係無間道。

11月港大民調結果連結
https://www.hkupop.hku.hk/chinese/release/release1559.html

最新港大民調結果連結 

https://www.hkupop.hku.hk/chinese/release/release1568.html

仲要比幾多次機會班長者高官？

特首林鄭見記者，話接受外界批評，同意政策可以處理得更謹慎更全面，和公眾互動更深入，會反思。然後筆者就又在網上見到五毛話比多些時間/機會佢啦。真係睇到我就黎覺得發火都晒gas。佢做左成40年官、60幾歲人，仲要比幾多時間/機會佢呀？一般人退左休架啦。

睇返，其實當日選特首時佢都咁講過架。搵返2017年1月的新聞，可以見到佢話自己「論盡」，公關技巧不足，要學習同市民溝通。諗返，我當時都已經同同事講，佢做左就黎40年官都未學習過同市民溝通架？結果，過左2年，好明顯佢冇學習，冇反省過啦。

講開，其實我幾年前已經因為一件事對林鄭個人睇法變得好負面，源於一句「天堂留左位比我」。佢當自己係神定教宗？一個人係要幾自大、自以為正確、自我感覺良好，先講得出依句？我以為神教人要謙卑既？所以我完全唔出奇佢做左40年官，都仲有咁多甩轆，咁多要反思，因為佢好明顯就係個你地意見講完，佢態度照舊的人，完全唔會有真反思。

事實係佢咁多年來都係咁樣態度。初次見面就好似和和氣氣，你講幾句佢唔岩聽就唔會聽落去。成名作皇后碼頭，係見你班示威者呀，不過一項意見都唔接受，只係重申佢已經決定左拆，佢話OK就OK。當日雨傘見學聯，開始時好似有禮貌，跟住越坐個表情就越唔耐煩。對民主派又係，上任開頭猛話大和解，依家有事起黎就只見親中派，到你班人求佢啦先得閒見吓你，仲不忘寸你係咪妒忌。唔只對反對派係咁，周永新同黃遠輝報告都係咁。

咁多年黎，咁多鑊野，態度照舊。你地依班上唔到天堂的罪人，佢根本唔會放在眼內。

所以咩比機會佢，真係難聽過粗口。示威的年青人，又唔見你地講比機會。

最後，班50後五毛廢老 (*都有唔係五毛/廢老的50後既，雖然係少數) 真係好心唔好再猛吹咩食鹽多過你食米，你班後生冇經驗冇乜乜物物。你望吓充斥著50後的現屆政府，有邊個唔係廢柴，係拎得出黎見得人既？我真係諗唔到。依班人40年前考第一、入大學、中AO、有大律師會計師，仲有做埋大學教授的，算係50後的 crème de la crème，精英中的精英，都係個個無能兼醜聞纏身。大學生浪費緊納稅人金錢？夠依個政府班人浪費？

長者高官拍片鼓勵長者

筆者又有新感想，醒起其實高官想鼓勵長者搵工的話，自己拍片鼓勵佢地就得啦，因為本屆政府已經以身作則，聘請多名無能長者做官，證明長者搵工係冇‧難‧度。

例如，羅致光可以拍片說：「我65歲，高分低能，都有人請我做局長，you can do it!」

林鄭可以拍片：「我61歲，做官以黎冇咩政策有過好下文，又唔識用八達通又唔識買廁紙，都有人搵我做特首，you can do it!」

張建宗：「我68歲，做咁耐官冇人講得出有過咩政績，一樣升到政務司，you can do it!」

陳茂波：「我63歲，又囤地又劏房，都做到發展局長同財政司，you can do it!」

鄭若驊：「我60歲，犯法僭建一樣做到律政司，you can do it!」

劉江華：「我61歲，只係個輸左選舉的賣剩貨垃圾桶，都賺緊30幾皮，you can do it!」

楊偉雄：「我63歲，冇人知我講緊乜話，都搵到工，you can do it! 不過我見過 steve jobs 架...」

陳帆：「我60歲，非常平凡，都撈到局長做，you can do it!」

象徵式扣高官3萬蚊人工

林鄭政府「大腦/腦細」勞福局局長羅致光繼續為提高長者綜援年齡解畫，指以後60-64歲綜援人士如果不參加「自力更生支援計劃」，不但無法取得「補鑊金」的1040元，更會被倒扣200元，形容是「象徵式」懲罰。筆者同意有能力者都應該自力更生，但係有參加就有額外一千，冇參加就冇，咪已經夠囉。倒扣二百，仲要叫做「象徵式」，我就真係諗極諗唔明。

根據社署網頁，一般成年綜援 (非長者/兒童/殘疾) 每月金額，視乎家庭情況，為2000元上下。例如單身人士就是2455元，200元就即是8.14%。8.14%都只係「象徵式」？換個計法，現時特首及一眾司局長的月薪為41萬6500元至33萬5100元不等，8.14%就是33930元至27300元。不知羅致光會否同意，扣佢地3萬蚊人工都係「象徵式」？

可能羅致光係以自己33.5萬月薪睇200元，咁就當然係「象徵式」啦，不過在一般市民，仲要係綜援受助人來睇唔係呢。我仲以為作為社福系教授同勞福局局長，理解市民特別係基層市民的需要係好重要添，原來唔係，一切都係冷血地機械式睇盤數就得，咁不如陳茂波去教社工/管福利啦。IQ160爆棚喎，睇到人眼火爆就差唔多。

只許政府暴政 不許法院制衡的前列官

傳媒報道，前終審法院法官列顯倫 (列顯倫法官，簡稱列官；已退休，要加個前字；故以下簡稱前列官) 批評司法覆核如果可讓法官一聲令下就將經多年醞釀、耗資數百億的高鐵工程煞停，乃否定民主，如同暴政。筆者看後，真是感慨前列官擁有如此獨特的民主觀。

首先，原來前列官認為現在香港的政府和立法會是民主代表，我想連親中派都冇好多人唔敢咁講，前列官真是眼光獨到。若然前列官這麼重視民主，我想他應該會同意直接公投，是否如梁愛詩所講炸左高鐵站佢，或者炸左沙中線，或者丟一萬億落海，或立即普選特首和立法會，或香港是否獨立。咁樣做最可以保證民主，係咪？

其次，可能前列官獨特的民主觀之中，不存在三權分立、互相制衡的概念。法院能夠煞停政府行動，正是為了防止政府可以任意妄為，而政府可以任意妄為正是暴政的誕生條件。睇返暴政的英文 Tyranny (前列官原話) 的解釋：arbitrary or unrestrained exercise of power。似乎前列官唔覺得失去法院制衡，會令政府有 arbitrary or unrestrained exercise of power，i.e. Tyranny。

第三，好多盲毛批評法官做咩都得不受制約，似乎連前列官都係咁諗，其實法官一樣受好多制約。法官的決定必須基於法律，政府行動被煞停，係法律在煞停政府。如果法律被修改，法官的判決也要跟隨改變，而修法權不在法官，是在政府 (提出) 和立法會 (審議和通過)，當然還有最強大的人大釋法，直接大巴大巴咁星落香港法官的臉上。法官絕對不是 arbitrary or unrestrained exercise of power，相反奪走法官的制衡能力，在中共控制人大、港府、立法會的聖父聖子聖靈下，後者就真係不受制衡，變成暴政。

第四，前列官除左獨特的民主觀，仲有獨特的法律觀。原來一件事花了很多時間和金錢，就不應該被阻止。咁下次有爭產案，輸左一方係咪可以話「我洗左咁多年咁多億打官司你連個桔都唔比我」？有殺人案，個兇手同被害人分別係某兩個識左好耐的富豪，兇手富豪密謀部署左好耐同請打手洗左好多錢，上庭時又可以話「我洗左咁多年咁多億買兇殺人同打呢場官司，你竟然可以判我輸」？

全城集氣 為高官名人無償工作打氣

筆者昨日出完一篇短文之後，左思右想，越諗越覺得少梗啲嘢。名人拍片集氣，靠打氣講幾句加油，就可以各行各業市民無怨無悔，無視人工和時間和工作量，永恆咁工作下去。逆向思考，全港各行各業市民拍片集氣，靠打氣講幾句加油，係咪可都以令一眾名人同高官無怨無悔，無視人工和時間和工作量，永恆咁工作下去？

例如，下次譚詠麟開騷，大家一齊拍片為佢打氣，請佢加油努力工作，然後全部場口免費畀市民入場，得唔得？反正學佢係打氣片入面話齋，「人間有愛」丫嘛，唔係唔派愛畀市民咁無情吓話？

下次政府又有醜聞，無論係人工島飄移、鐵道工程造假、車站沉降，總之有事係令到超支，又要市民血汗錢冤枉去，大家應該拍片為主事官員和公司高層打氣，請佢地唔好灰心繼續努力，但同時為事件負責退還N年人工以表歉意。無償工作好濕碎，最緊要係你地有我地拍片支持打氣嘛，you can do it！

最後，如果可以全城公院醫護拍片集氣，為醫管局高層捐出一年薪金回饋前線打氣，豈不成一則美談？

名人拍片齊集氣 正能量建人工島

(此為印象圖片，實物未必一樣)

傳媒報道，針對日前醫護界集會不滿待遇和工作量，醫管局回應指已經找來名人拍片集氣正能量，為大家加油。原來靠正能量加油就可以解決人手、人工、工作量問題，政府又再袋錢落我袋度了。於是我又想，這一招應該多加推廣。例如下次警界抱怨待遇不足，我們找來向太等為他們打氣加油，兼舉行爆粗發洩大會，警察們條氣就會順晒，問題解決，無須改善待遇。公務員工會要求加薪，我們也是找一班正能量為他們打氣加油，公務員工會就會感激流涕停止要求。工程界抱怨政府撥款不足，拍片，搞掂，立法會一個仙都唔洗畀。60-64歲人士不滿冇左綜援，拍片。N萬人輪緊公屋公院老人院，拍片。新繞道開通後仲塞過以前，拍片。中美貿易戰，美國或許取消香港獨立地位，香港商界驚到騰騰震，拍片。林鄭嫌做特首係辛苦工，拍片。名人拍片集氣正能量，可以解決香港所有問題矣。

由此推論，價值一萬億的人工島，其實應該一毫子都唔洗出的。只要找來夠多的正能量名人拍片打氣，工程公司和工人們就會無怨無悔支撐下去直到完工。正能量、發念力可建人工島！

難分大腦定腦細

曾經，有個人被稱作民主黨大腦。講緊當然就係IQ160的羅致光。我唔知點解佢會做到民主黨大腦，可能佢IQ高，但淨係要IQ高的話去些甚麼資優學生會度求其「的」個人都有啦。如果講業績，好似佢做咁多年大腦民主黨的表現就一年衰過一年，根本就係腦細，晨早該炒。基本上，我懷疑羅致光做大腦/腦細係拖累民主黨，所以我覺得民主黨應該開香檳慶祝依個大腦/腦細去左777度，輪到777受其害。我真係恭喜妳呀！

民主黨歷年立法會選舉戰果 (議席/得票率) (直選only)
1998 9席 (20席直選) / 42.9%
2000 9席 (24席直選) / 35.0%
2004 7席 (30席直選) / 23.7%
2008 8席 (30席直選) / 20.7%
2012 4席 (35席直選) / 13.7%
2016 5席 (35席直選) / 9.2%

777受咩害呢？長者綜援風波。其實都唔只係羅致光的問題，畢竟有人指出以往政府都有計劃過，再加上有777依個乜都要計一餐婆乸數的公務員腦特首，冇羅致光都遲早會咁做。不過至少對我黎講，件事好笑在，依頭cut錢本來係為長遠人口乜乜乜，轉個頭就為左比親中派有得唔見間廠成功爭取粒糖，又整個短視到暈的就業津貼，好明顯依個政府就冇晒方向，見招拆招。不過777係咁架啦，口講就天下無敵咩管治新風格，其實咪又係咁。

話時話我同羅致光有過一面之緣，雖然都係我識佢佢唔識我果隻。我仲在港大讀書時，上過佢一堂。我都自問領悟能力高的了，上咁多其他教師 (廢唔廢都好) 的堂我都明，唯獨是羅致光果堂我完全唔知佢up乜。可能你話人地IQ高，太高層次我理解唔到。可能啦，但我覺得，你屈埋係房做research係一件事，講到教書，講到學生明都應該掛。又或者，純粹我唔係果D唔明就會話「依個人真係高深勒」果隻人。可能民主黨好多依D人，我唔知。

By the way，壽命延長就要延長長者定義，咁係咪都應該改埋其他野？例如120歲時，免費教育起碼到30歲啦吓話？關愛座起碼80歲先坐得啦吓話？唔知衰11洗唔洗改埋一份？

齊白石得 顏真卿唔得

傳媒報道，台北故宮博物院向東京國立博物館借出唐代名書法家顏真卿真跡《祭侄文稿》，引發大陸網民狠批忘記侵華歷史，又說國寶只有一份「展一次傷一次」。

筆者看到後就衰在記性太好，記起上月東博才展出完由北京畫院借出的民初大師齊白石的多幅畫作、曾用過的文房四寶和筆記簿等，主題還寫明是紀念中日和平友好條約40周年。

筆者只想到兩個可能。一是齊白石不夠國寶級，不是無價寶，所以受下傷也冇所謂。二是齊白石有畫作國寶級，但北京畫院專登揀剩籮底橙給東博，所以唔洗擔心。

記性再好些，又會記起再早一排東博仲展出了文徵明、王陽明、鄭板橋等的墨寶，不過係該館自藏，唔係特別展，所以冇特別宣傳。如果留左係大陸，唔知今日仲有冇機會睇到呢？

一個月前北京借齊白石就中日友好，一個月後台北借顏真卿就毋忘南京大屠殺。唉，真係比D死人抖抖啦。仲有，咁關心南京大屠殺，不如關心埋郭紹傑，聲援吓佢啦。仲有唔好唔記得遠在紐約，被西方敵對勢力的假法治制度玩殘的肥平呀。

齊白石墨寶

齊白石畫

齊白石畫

齊白石畫

齊白石畫

鄭板橋墨寶

王陽明墨寶

文徵明墨寶

親中派會嬲嬲豬？係咪太睇得起人

長者綜援提高領取年齡，事情近日引起關注後，各方議員加入圍抽政府，但特首林鄭一句「係你地批准架」就將親中派議員全部KO。有人說親中派議員會嬲嬲豬，筆者就覺得，你係咪太睇得起親中派，定係 too simple sometimes naive。佢地係冇靈魂冇思想冇感情的軀殼，用三個字就係行屍走肉，行動全聽趕屍師父下令。所以就算佢地真係對林鄭有一丁點怨言，西環一出四個字急急如律令，佢地就全體歸位做返舉手機器。大家無需有半點懷疑或憂慮，一切終將如常運作，everything under control。

講返林鄭「係你地批准架」依個邏輯都好有趣。就好似DQ本土派咁，邊年邊月邊日FB講過句咩都會被DQ主任找返出黎批鬥。我就諗啦，咁例如政府的工程超支要追加撥款，議員是否可以用「我地批准過一次架」或者「條數係你地計過架」reject呢？林鄭政府有新政策推出，而且係要推翻原有政策時，是否可以用「根據集體負責制，你以前做梁/曾政府時批准架」或者「你以前做社署署長時冇反對過架」反駁？更加唔洗講依家幾多土地問題 (e.g. 新界土地/村屋僭建) 同社會政策問題係同佢依位前發展局局長/政務司司長有關，仲有佢講過幾多次要退休返英國陪屋企人都走數。當然仲有，當年做官宣誓過效忠英女王，或者曾為港英服務，或者家人行使過居英權做王民 (英女王子民)，又點計呢？

事頭婆唔退休 英國咪冇退休年齡？

特區政府將長者綜援領取年齡調高至65歲，特首林鄭話是因為香港人變長命，工作和退休年齡延長，又以自己60幾歲仍每日工作十幾小時為例，說明措施冇咩野。筆者一聽到就諗，阿頭做到幾歲下面就要做到幾歲，咁長和、恆基、澳娛/澳博、TVB (以前) 的打工仔就死啦，個個唔做到8-90甚至100歲都唔得。再諗遠一點，事頭婆話唔會退休要做到死，咁英國咪全國人唔比退休？

筆者成日比人話個樣後生，有人就會加把口話我唔洗捱，咁我點都唔夠林鄭唔洗捱。林鄭話自己一日工作十幾小時，唔知係咪計埋去西環聽柯打、坐飛機上京覲見習總、去珠西考察大灣區、同政黨/富豪酒會飲飲食食嘻嘻哈哈咁呢？做老細仲有樣好就係可以自己改自己工作範圍，例如英文記者提問就唔洗答、邊D議員就問題太無聊唔洗見、邊D政府委員會報告同我諗法不符就掟埋一邊。仲有林鄭生活上都係唔洗捱。眾所周知，佢N年黎都係有AM車接送同官邸住架嘛，唔係點會廿年前面世的八達通都唔曉用，或者唔識自己買廁紙呢？咁樣做到70歲，我都冇問題呀，不過一般打工仔女唔係囉。

唔知點解老細都中意用自己角度睇人，或者話當年自己點點點。好似廿蚊張話自己老婆當年大肚冇侍產假咁，張太大肚時返緊咩工我就唔知 (我只知張太做過小學校長，因為我讀果間小學)，但我斷估佢唔係做緊酒樓侍應或者廚房洗碗依類辛苦工掛？同埋當年點依家就要點架拿？學人話齋，古代人夠冇冷氣冇電腦冇汽車，你依家又要用？當然再極品的就有 Package Lau，教人去少幾次日本就買到樓，唔知佢去一次日本係咪要洗一百萬，我去就洗一萬零架啫，去少一百次都未買到樓囉。好在賭王就唔會周圍鼓勵人要有多D紅顏知己。

講返綜援。壽命變長，退休延長，醫療福利開支增加，的確係全世界國家都面對緊的問題，香港人亦遲早要思考「人生100年」(日本近年流行語) 要點分配使用。但不同係，香港本身福利唔多，盈餘就勁多，根本冇人明邊度黎咁大財政壓力要節省開支。要說服人，唔係用一句「我都60幾都仲返緊工」就得囉，唔該用多D理據好冇？咁當然我都知林鄭一向唔係以理服人，係「我話OK就OK」，即係好似佢唔知點樣就知道填海係最佳選項，又唔知點樣就知道填海獲得多數市民支持，可能又係神話比佢聽啦 (即係幻聽)。一萬億丟落海就濕濕碎，長者定一般綜援爭果幾舊水婆乸數就計到盡，林鄭開頭成日講咩管治新風格，睇到啦。

為了焦土 支持鄭若驊永續律政司

香港又有高官醜聞，眾人又例牌叫人下台，我不以為然。

好多人仍然心存幻想，香港的制度是成功的，現在只是被幾粒小小的老鼠屎搞禍，撇走了就沒事。真係？計我話香港在內外夾擊下，已經病入膏肓徹底淪亡，外被中共全方位箝制，內則班建制個個無恥無極限。所以換走一個中共爪牙，頂上的只會是另一個中共爪牙，不會有改善。講白啲，你唔係諗住林鄭會良心發現換個好人做律政司呀？

既然如此，不如讓依個擺明又廢又冇品的人永續做落去，讓全世界都夢醒，香港正苦真係冇得救。重點係全世界，即包括外國勢力。對外國勢力而言，香港的僅餘價值，是同大陸不同的法制和法治。如果冇法治保障，隨時變臉告你侵權或者洗橫手封殺你，跟住打親官司都係公佢贏字你輸，有咩錢賺都係假，南柯一夢。正所謂警察、ICAC、出入境、證監、交易所、律師公會、法官...全部都係中共嘅人，你真係放心喺依度做生意？

所以有個擺明破壞法治同聽大陸支笛的律政司，將有助加速外國勢力對香港法治失去信心，加速取消香港關稅區同各種「獨立」待遇，香港失去中共做暗中交易的定位，利益集團徹底崩潰。對想「焦土」的人來說，沒有比這更有效的招數的了。

唔好咁大聲比美帝知呢個女人有警轟

「華為太子女」孟晚舟被楓葉國拘捕，面臨引渡到美帝國，中共反應異常強烈，本港親中派亦跟隨到領事館外示威，招呼級數同淪為「八萬五」已經唔存在的「肥平」何志平截然不同。筆者有三個聯想。

一，中共同親中派平日教人正能量，唔係身有屎又洗乜驚嚴厲執法/立法云云，依家咁大反應，一個可能係佢哋缺乏正能量，二係此女真有問題。肥平罪名係在非洲行賄，講真邊個去非洲做生意唔行賄架。但華為係中國科技巨頭之一，超英趕美計劃重要一環，仲未計中共可能藉華為產品做了手腳，太子女隨時身持大量國家機密。

二，而中共越係大聲，反應同平日越係唔同，大概只會越令美帝相信依個女人有警轟。所以依家華春瑩 or whoever 外交部發言人就好似家有囍事的毛舜筠其中一幕：「唔好咁大聲呀！唔好比美帝知呀！唔好咁大聲呀！唔係會好大鑊架啦啦啦啦啦...」又或者吳君如講普通話：「領導，呢個女人呢，是華為的高層，明明是大陸人就冒充香港人參加選美...對對對，得閒飲茶，再見。」

三，太子女同肥平在中共眼中天同地比，加上接連有持香港護照商人被美帝追捕，相信唔少親中港商睇到心寒。港商身份已經冇用，被美帝視為「首先是中國人」，在美中貿易戰開打下，同樣係被追捕同打擊的對象，繼續落去隨時連揸外國護照都冇用。而中共亦都唔當你係親生仔女，你被捉就你死你事。親中港商由想做牆頭草，邊揸外國護照邊攞大陸著數，變成兩面不是人，要走都冇路走。

對此，除左「我真係恭喜你呀！」之外仲有咩好講？請準備香檳同有請小鳳姐！

不反對他人持英國護照=隱晦支持英國殖民主義

不明確反對他人主張港獨主義=隱晦支持港獨主義。筆者睇到呢度，真係拍案叫絕：唔怪得人地咁高人工我冇，皆因人地思維邏輯我地永遠都追唔上，佩服佩服！不過我又另外開始諗啦，一眾親中派固然經常明確反對港獨主義，但我好似冇咩見過佢地明確反對台獨主義、藏獨主義、疆獨主義、蒙獨主義、日本軍國主義、美國帝國主義、英國殖民主義，會否被人誤以為佢地隱晦支持？

我建議佢地應該立即搞返場萬人聲討大會，仲要叫晒國際媒體影住，逐一譴責台獨主義、藏獨主義、疆獨主義、蒙獨主義、日本軍國主義、美國帝國主義、英國殖民主義。而為表示明確反對，佢地應該係場中間搞返個 bonfire，燒晒英國護照、美國護照、港英頒發的荷蘭水蓋、港督簽名的大學畢業證書等等。

而且，因為依家唔係講緊本人的主張，你唔明確反對他人都係等於隱晦支持嘛，所以佢地仲要從親戚朋友手上強搶佢地的英國護照美國護照黎燒晒佢 (btw記得好似周融同梁君彥咁正式申請退出)，宣誓自己同屋企人同朋友永遠唔去日本旅行振興佢地經濟，否則就係隱晦支持英國殖民主義、美國帝國主義、日本軍國主義啦。

最後記得聲討埋ISIS，否則可能被人以為隱晦支持恐怖主義添。

默克爾預早宣布退休的因由

文章已在《am730》刊出
https://www.am730.com.hk/news/%E6%96%B0%E8%81%9E/%E8%A7%80%E5%AF%9F%E9%BB%98%E5%85%8B%E7%88%BE%E9%A0%90%E6%97%A9%E5%AE%A3%E5%B8%83%E9%80%80%E4%BC%91%E7%9A%84%E5%9B%A0%E7%94%B1-149196


德國總理默克爾上周突然宣布不會在下屆大選 (最遲2021年) 中競逐連任，亦不會在下月的執政黨黨魁選舉中競逐連任，受到國內外關注。自從立場保守的特朗普當選美國總統，英法又受國內問題困擾，默克爾被視為國際政治上最大的一把自由派聲音，和歐盟的掌舵人。儘管她仍未正式退位，這樣一早為自己任期畫下期限，無疑會令她被視為跛腳鴨，打擊其影響力。到底默克爾這樣做的盤算為何，又會有何影響？

默克爾今次預報退休的背景，是她所屬的基民黨支持度持續下跌，亦在上月的兩場地區選舉中表現欠佳。根據最新民調，基民黨的支持度約26%，較去年9月大選時的得票率33%跌了不少，也是基民黨戰後創黨以來最差。跟基民黨共同組成政府的社民黨就更唔掂，最新支持度僅14%，從大選時的第二大黨 (及21%得票) 跌至第四。於是基民黨內有聲音要求換人向民眾展示新氣象，社民黨亦有聲音要求退出執政聯盟以免進一步受累。所以默克爾今次宣布某程度上是先發制人，在自己被逼宮前先為自己建下台階。事實上默克爾做到2021年的話，屆時將是67歲和當了16年總理，不少分析早就估計她不會再競逐連任。

除了先發制人，默克爾亦可能是想給繼任人時間準備。總理和執政黨黨魁不是同一人，戰後德國只試過一次，是罕見做法。在下月基民黨黨魁選舉中勝出者，肯定會被視為候任總理，他亦肯定不會願意等到2021年才做總理，畢竟到時基民黨會否再贏都未知。如果默克爾現在立刻退位，也會引發更大的政治震盪。所以默克爾不做黨魁但暫且繼續做總理，很可能是想讓繼任人有時間熱身，與此同時確保政治穩定和交接順利。待雙方覺得時機成熟了，不一定等到下屆大選，默克爾就會辭去總理。

還有一個考量，就是誰會當上繼任人還是未知鹿死誰手，默克爾要做兩手準備。德媒一般視被默克爾提拔為黨秘書長的克蘭普‧卡倫鮑爾是默克爾間接欽點的繼任人，但始終這是場黨內民主選舉，有欽點也不一定贏，現在一些批評默克爾路線的黨幹部也有參選黨魁。整體來說，默克爾一派應該是佔上風的，那默克爾就可以按原定計劃準備交接。萬一批評默克爾者勝出，默克爾也可嘗試繼續做總理死拖不交接，當然對方可能會逼宮，但總之以默克爾出了名的謹慎，她必然會做好兩手準備。

探討完默克爾的想法，接下來談其影響。默克爾之所以被視為國際自由派舵手，有幾個因素。一是德國是歐盟最大國，左右歐盟決策，而歐盟立場又在很多國際問題上都很重要，於是德國在國際上舉足輕重。這一點不會因德國總理換人而變。二是默克爾已經在任13年，經驗豐富，跟多國領導人有溝通，加上德國政治相對穩定，令她在其他領導人面前有較大發言力 (不會被質疑是否「後欄起火」)。這一點，她的繼任人會較輸蝕，發言力一定不及她。

三是她在難民、身份認同、貿易、環保等議題都持明確的自由派立場。可這會否因換人而變，值得商榷。換個問法，這到底是默克爾的個人立場，還是德國政界主流共識？如是前者，德國政府立場會在換人後有變，後者則不會。就此，我們須理解雖然默克爾在國際上被視為自由派甚至偏左，在國內是中間派甚至偏右。所以她的繼任人就算比她右傾，亦不會達到國際間極右的程度，尤其是基民黨靠社民黨支持維持國會過半議席，不可能過於右傾。

我的估計是，即使有新總理，德國在多數議題上的立場不會有大變動，始終國家利益所在不會只因換人就變，何況現在也不是換執政黨，最大機會變是難民和身份認同。但現在流向歐洲的難民數目已大跌，實際需要做的不多，出口術和做些象徵式措施已足以應付。

當然，就算只是出口術和象徵式，都會令外界有不同觀感，加上新總理在國際上發言力會不及默克爾，歐盟內的極右或民粹政黨肯定會更氣焰。不過這股浪潮會維持至幾時還很難講，例如最新在美國，特朗普的共和黨就輸了眾議院控制權。有時把聲更大，不代表就能取得更多民眾支持。事實上有評論反指，當被右派仇視的默克爾下台了，德國換了一位把口較右傾的新總理，其他歐洲主流政黨亦跟隨調節立場，反而可能讓他們從極右或民粹政黨上搶回選票 (類似的情況已在奧地利上演)。當然對自由派來說這不是最好的結果，但如果可以藉此擊退極右或民粹浪潮，也許這也不是一個壞的結果。

原來我幫緊陳凱欣宣傳

據報陳凱欣在出席 nowTV 選舉論壇，被問到作為記者會否訪問陳浩天時說：「你一定會問佢點解宣揚港獨，咁佢會講佢番理念，咁咪宣揚港獨緊港獨囉！」原來報道內提及佢理念就係幫緊佢宣揚，咁經常深入追蹤報道港獨的大公文匯肯定係大肆宣揚緊港獨，而在施政報告提及港獨的梁振英就更加係名符其實的港獨之父了。

用同樣邏輯，我仲諗到一些例子：

報道侵侵的貿易戰理念就係宣揚美國帝國主義 << ban

報道安倍去靖國神社就係宣揚日本軍國主義 << ban

報道英國議員批評香港民主自由就係宣揚英國殖民主義 << ban

報道蔡英文、達賴、熱比亞就係宣揚台獨、藏獨、疆獨 << ban

報道 ISIS 就係宣揚伊斯蘭極端主義 << ban

大陸藝人在微博愛國 << 可以報，但，台灣導演在金馬獎「播獨」<< 唔可以報

大陸運動員贏獎感謝國家 << 可以報，但，大陸馬拉松跑手丟低國旗<< 唔可以報

香港係「獨立」關稅區 << 唔可以報

經常報道「因航」的「方向報」其實係免費幫緊「因航」宣傳 << goodest logic

最後，筆者在開頭 quote 了陳凱欣一句，quote 了她的理念，所以其實我依篇文都係幫緊陳凱欣宣傳。請選舉事務處唔好向我或轉載依篇文章的網媒追選舉經費。相對地，如果陳凱欣勝選，我同一眾網媒都應記一功，畢竟我地咁落力幫佢宣傳嘛。娜，邊位讀者 share 依篇文都係幫緊陳凱欣宣傳呀吓。認同請唔好廣傳。

林鄭見美帝講呢啲

美國帝國主義者威脅撤銷香港獨立關稅區地位，特首林鄭說會見美國有關方面和商界表明立場，筆者實在不能同意更多。就此，我草擬了一份聲明，認為林鄭應在見美帝時講呢啲：

「香港自古以來就是中國神聖不可分割的領土，香港人從來都是首先是中國人。廣大香港人民堅決擁護以習近平國家主席為核心的中國政府，全力支持實現中華民族偉大復興的中國夢。香港政府堅定不移反港獨，絕對不會受到外部勢力的指手劃腳和說三道四動搖。而有了一帶一路、珠西大灣區、明日大嶼的國外國內港內三重互補優勢，香港的發展前景無可限量，不用懼怕任何外部勢力的干預威脅。我再重申一次，任何人士以任何方式，包括以言論自由和經濟自由為幌子，試圖將香港從中國分裂出去獨立出去，都是踩紅線越底線，注定失敗的。在國家主權和領土完整的最根本問題上，絕對沒有任何讓步空間。」

或者有簡要版：

「我哋有一帶一路、珠西大灣區、明日大嶼，仲加埋我咁好打得，驚你美國佬制裁有牙呀？Collect 啦你。You un ng un what is collect ar？」

馬其頓改國名所為何事

文章已在《am730》刊出
https://www.am730.com.hk/news/%E6%96%B0%E8%81%9E/%E8%A7%80%E5%AF%9F%E9%A6%AC%E5%85%B6%E9%A0%93%E6%94%B9%E5%9C%8B%E5%90%8D%E6%89%80%E7%82%BA%E4%BD%95%E4%BA%8B-130911


早兩星期，就在全球關注特金會之際，有一單同日發生的國際新聞可能被大家忽略了，就是歐洲小國馬其頓宣布將會改名北馬其頓。為何無端端要改國家名呢？其實這不是無端端，事關馬其頓能否加入北約和歐盟，對地緣政治有不少影響。

馬其頓位於巴爾幹半島，希臘北鄰，人口約200萬，是1991年南斯拉夫解體後成立的新國家。說新國家的話當地人大概不會同意，畢竟大家都應該聽過古代西史有位亞歷山大大帝，就是2300年前的古代馬其頓王國國王。正是這位亞歷山大大帝搞到馬其頓和希臘鬧交，希臘妨礙馬其頓加入北約和歐盟。

作為古代西史偉人，現代希臘和馬其頓當然都想從亞歷山大大帝韜光，加強自己的歷史文化實力，而某程度上，現代希臘比馬其頓更有資格自稱是亞歷山大大帝後人。古馬其頓受古希臘文化影響極深，古馬其頓經常被當成古希臘文化圈的一部分，古馬其頓人最終被希臘人同化，連古馬其頓首都也是在現今希臘境內 (古馬其頓領土橫跨現代希臘和馬其頓)。反觀現代馬其頓人跟古代馬其頓人其實不是同一種族，更接近保加利亞人，是距今1500年前才抵達馬其頓地域。

由於這個問題，自馬其頓脫離南斯拉夫獨立以來，希臘都指責馬其頓想搶奪其歷史文化，甚至說馬其頓有意染指希臘境內的馬其頓地域。由於希臘已經加入了北約和歐盟，對新申請加入者有否決權，希臘一直阻攔馬其頓加入。希臘甚至逼其盟友的歐美多國不可直呼馬其頓為馬其頓，必須稱其為「前南斯拉夫馬其頓共和國」，英文簡寫FYROM，也就是說標明這個馬其頓跟古代馬其頓是不同的。現在希臘對改名北馬其頓表示歡迎，指這顯示馬其頓放棄成為全馬其頓歷史文化和地域代表的主張。

馬其頓只是個200萬人的小國，加不加入北約和歐盟有很大差別嗎？打開地圖，會看到前南斯拉夫國家被已經加入北約和歐盟的希臘、保加利亞和羅馬尼亞包圍，是北約和歐盟勢力範圍的一個缺口。這個缺口正被俄羅斯虎視眈眈，俄羅斯一直試圖加強在前南斯拉夫國家的影響力，讓他們不加入北約和歐盟，確保這個缺口存在。因此前南斯拉夫國家就成為了美歐和俄羅斯之間角力的棋子。當然，北約主要是軍事合作，歐盟則包括經貿和居住權等問題，加入後者過程較繁複，美歐的想法是先讓他們加入北約。

前南斯拉夫國家中，斯洛文尼亞和克羅地亞已經加入北約和歐盟。黑山，以及非屬前南斯拉夫但位置相鄰的阿爾巴尼亞，則是已加入北約，未加入歐盟。剩下的馬其頓、塞爾維亞、波斯尼亞、科索沃是兩者也未加入，但有展開商討。塞爾維亞和科索沃問題是連著的，一日塞爾維亞不解決跟科索沃的領土爭議，都很難加入北約或歐盟。波斯尼亞則因內部種族問題令情況較複雜。相對的，馬其頓只要解決了希臘的反對，加入就可以順暢得多。美國和英法德等都支持希臘和馬其頓解決爭議。

可是，今次馬其頓宣布將會改名，問題就一勞永逸嗎？變數還有不少。第一，改名要獲公投通過才能實施，而馬其頓民意是否支持改名，仍未明確。第二，現屆希臘政府是左翼政府，較不重視民族主義，所以對馬其頓態度較柔軟，但在野的右翼政黨都表明不收貨，必須馬其頓不再叫自己馬其頓才可 (即是無心解決爭議)。希臘明年大選，民調顯示在野的右翼政黨領先，新政府上場後反口，也是有可能的。

除了馬其頓，希臘亦牽涉入另一個領土爭議，就是地中海島國塞浦路斯。該島由希臘人和土耳其人居住，但方在1974年分裂為南北兩半，背後各獲希臘和土耳其支持。由於這個問題，希臘反對土耳其加入歐盟 (土耳其已入北約)，土耳其則反對塞浦路斯加入北約 (南塞浦路斯已入歐盟)。近年南北雙方和談有進展，但何時能統一仍是未知。不過考慮到近年土耳其在總統埃爾多安領導下走向專制，跟歐盟關係亦轉淡，即使塞浦路斯爭議解決了，希臘不反對了，土耳其大概還是很難加入歐盟。

高官賴死不走好容易？

文章已在《am730》刊出
https://www.am730.com.hk/news/%E6%96%B0%E8%81%9E/%E8%A7%80%E5%AF%9F-%E9%AB%98%E5%AE%98%E8%B3%B4%E6%AD%BB%E4%B8%8D%E8%B5%B0%E5%A5%BD%E5%AE%B9%E6%98%93%EF%BC%9F-113300


看到標題，別誤會，這篇文不是講香港，是講外國。傳媒很愛叫人下台，美國的特朗普、英國的文翠珊、日本的安倍晉三等等，都因為民望低，被傳媒批死一定會下台。但新一年開始了，他們仍然在台上。今次文章會談一下為何這些高官沒被罵走。

特朗普仍獲共和黨基層支持

美國總統特朗普上台以來醜聞不斷 (應該說上台前也已經醜聞不斷)，儘管經濟向好，他的民望仍在低位徘徊，最新的蓋洛普民調顯示其支持度只有36%，反對度卻有59%，差距甚大，而且這差距已持續數月都沒有好轉。反對派民主黨的議員說應該彈劾他逼他下台，而從民調看，這樣做似乎會得到不少民眾支持，但國會兩院由共和黨控制，主動權不在民主黨。共和黨方面其實亦傳出不少大老認為特朗普已成負累，不但民望低，治國也缺乏方向，份人又難以合作，不如彈劾他，由形象較好的副總統彭斯取代。

不過共和黨大老不敢這樣做，而最主要的，是特朗普在共和黨基層中的支持度仍然極高，令共和黨大老擔心彈劾特朗普會引來基層不滿。同一個蓋洛普民調就顯示共和黨員仍有81%說認同特朗普表現，反對他的主要來自民主黨員，只有5%認同他，中立者則只有31%認同。需知道，共和黨的議員要連任，第一步要先在黨內初選勝出，因此他們不可能得罪黨的基層，不然在初選就輸了，你幾得到中間選民或民主黨員支持都沒有用。

所以，一些膽敢跟特朗普唱反調的共和黨議員都是參議員，因為參議員是6年一任，很多還要過幾年才要面對選舉，可以暫時不理來自基層的壓力。其中一些更已經豁出去，講明自己不會爭取連任，那就更無後顧之憂，可以按自己的政治理念行事了。不過這些人終究是少數，特朗普暫時仍然安全。但如果2020年總統選舉臨近，他的民望再不上升，不像會贏，到時共和黨議員會怎樣就很難說了，畢竟政客當然是見風轉舵「投贏果個」。

保守黨分裂文翠珊得利

英國首相文翠珊方面，自從她無端端宣布提早大選卻輸掉，聲望暴跌，各種不利消息特別是內閣內鬥不斷，各界都批死她會下台，或是被黨內挑戰者逼宮，甚至有人估工黨的科爾賓會上台。但當然這沒有發生，文翠珊做到現在，賴死不走，大家都耐何不了她。

首先我們要明白，逼宮不是只有逼宮一個步驟，還要有個能夠取代文翠珊，在新的黨魁選舉中勝出的人選才行。現在問題就是想推倒文翠珊的人很多，但能夠找到足夠支持讓自己做新黨魁的人卻欠奉。我們重溫當日文翠珊是怎麼當上首相的。當時支持留歐的卡梅倫因為脫歐公投失敗辭職，由脫歐派做下任首相似乎順理成章，但脫歐派同時有幾個人想做，無法團結，而留歐派亦不甘認輸，於是找來文翠珊這個立場曖昧 (她說支持留歐但沒有在公投期間為留歐拉票) 的人出馬，並且講出「脫歐就是脫歐」這個曖昧口號 (似乎支持脫歐但沒有具體說明)，成功得到部分脫歐派支持，一統江湖，當上黨魁和首相。

現時保守黨內脫歐派和留歐派之爭，又再細分為硬脫歐派、軟脫歐派和暗地裏想留歐派之爭，更加錯綜複雜，令想取代文翠珊者更難湊夠支持。因此文翠珊死不辭職，其他人也推倒不了她。還有一個考慮，就是現在保守黨沒有國會過半數，即使取代了文翠珊，新首相所面對的局勢仍然嚴峻，何況還有脫歐談判這個燙手山芋未解決，現在取代她做首相其實無甚好處。某程度上，外面威脅反而有利文翠珊。所以文翠珊有一定機會能做到脫歐談判結束為止。

反對派分裂安倍晉三得利

日本首相安倍晉三方面，儘管他年中接連爆出醜聞，還輸掉幾場地方選舉，令民望下跌，外界以為他大勢已去，但他反應夠快，立即改組內閣，不但延攬一些受歡迎的政客入閣提高支持度 (如外相河野太郎和總務相野田聖子，民調說有7成人認同他們入閣)，同時藉分豬肉拉攏自民黨內派系支持，靠一招就成功穩住局勢。

相對的，反對派情況混亂，本來的最大在野黨民進黨民望低迷，一些成員於是出走跟東京都知事小池百合子組成新黨希望黨，另一批成員則不滿小池和希望黨方向，又組成另一個新黨立憲民主黨，令民眾無所適從。安倍宣布提早大選，在反對派內鬥分薄票源之下，自民黨成功勝選，安倍順利連任。直到現在，反對派幾個黨仍然繼續分裂，未能就團結對付安倍達成共識，安倍相位更加穩固，甚至有機會實現他的修憲大夢，儘管民調顯示他的支持度只有4成左右，並不算高。

以上三個例子可見，高官不是外間罵或者民望低就會下台的，自家陣營和對家陣營的形勢都有重要影響。如果執政陣營夠團結，反對陣營則散沙一盤，而且有排都不用面對下一場選舉，賴死不走是絕對可行的。