2019年1月29日

仲要比幾多次機會班長者高官?

特首林鄭見記者,話接受外界批評,同意政策可以處理得更謹慎更全面,和公眾互動更深入,會反思。然後筆者就又在網上見到五毛話比多些時間/機會佢啦。真係睇到我就黎覺得發火都晒gas。佢做左成40年官、60幾歲人,仲要比幾多時間/機會佢呀?一般人退左休架啦。

睇返,其實當日選特首時佢都咁講過架。搵返2017年1月的新聞,可以見到佢話自己「論盡」,公關技巧不足,要學習同市民溝通。諗返,我當時都已經同同事講,佢做左就黎40年官都未學習過同市民溝通架?結果,過左2年,好明顯佢冇學習,冇反省過啦。

講開,其實我幾年前已經因為一件事對林鄭個人睇法變得好負面,源於一句「天堂留左位比我」。佢當自己係神定教宗?一個人係要幾自大、自以為正確、自我感覺良好,先講得出依句?我以為神教人要謙卑既?所以我完全唔出奇佢做左40年官,都仲有咁多甩轆,咁多要反思,因為佢好明顯就係個你地意見講完,佢態度照舊的人,完全唔會有真反思。

事實係佢咁多年來都係咁樣態度。初次見面就好似和和氣氣,你講幾句佢唔岩聽就唔會聽落去。成名作皇后碼頭,係見你班示威者呀,不過一項意見都唔接受,只係重申佢已經決定左拆,佢話OK就OK。當日雨傘見學聯,開始時好似有禮貌,跟住越坐個表情就越唔耐煩。對民主派又係,上任開頭猛話大和解,依家有事起黎就只見親中派,到你班人求佢啦先得閒見吓你,仲不忘寸你係咪妒忌。唔只對反對派係咁,周永新同黃遠輝報告都係咁。

咁多年黎,咁多鑊野,態度照舊。你地依班上唔到天堂的罪人,佢根本唔會放在眼內。

所以咩比機會佢,真係難聽過粗口。示威的年青人,又唔見你地講比機會。

最後,班50後五毛廢老 (*都有唔係五毛/廢老的50後既,雖然係少數) 真係好心唔好再猛吹咩食鹽多過你食米,你班後生冇經驗冇乜乜物物。你望吓充斥著50後的現屆政府,有邊個唔係廢柴,係拎得出黎見得人既?我真係諗唔到。依班人40年前考第一、入大學、中AO、有大律師會計師,仲有做埋大學教授的,算係50後的 crème de la crème,精英中的精英,都係個個無能兼醜聞纏身。大學生浪費緊納稅人金錢?夠依個政府班人浪費?

1 則留言:

  1. Packers and Movers Pune Provide High Quality ***Household Shifting, Home/Office Relocation, Insurance, Packing, Loading, ###Car Transportation Service Pune and High experiences, Top Rated, Safe and Reliable, Best and Secure Packers and Movers Pune Team List. Get ✔✔✔Affordable Rate Charts and Compare Quotation and Save Money and Time @ Packers And Movers Pune

    回覆刪除