炸左佢再起過 哥倫比亞都識梁愛詩

截圖自BBC報道
https://www.bbc.com/news/av/world-latin-america-44802768/colombia-s-tragedy-road-bridge-demolished

「不如炸左佢再起過！」梁愛詩當日提出的高鐵西九站問題解決方案，如今竟在地球另一端實現。講緊是外媒報道，哥倫比亞一條興建中的大橋因年初發生工業意外，調查後發現設計和安全有問題，當局唔係「洗濕個頭」就幾歹都要起落去，而係一於炸左佢再起過。

諗落，梁愛詩方案其實有不少好處。例如，炸左佢再起過，即是要長一倍時間去起，工人就可以繼續有工開，工程界又多一倍市民血汗錢呃，無能官員又多一倍可以貪落袋。如果可以早日決定揮淚炸大橋，亦都可以免去用特權法調查的需要，議會唔需要搞太多政治，相關公司唔會造成好大滋擾。一句到尾，馬時亨你O唔OK？你話OK就OK架啦。

深圳高球會結業 豈有此理

筆者日前看到一篇新聞報道，說深圳有高球會結業，引發苦主在涂謹申帶領下遊行到中聯辦要求介入，起初我是不相信的。大灣區滿布機遇，遍地黃金，做生意有賺冇賠，人人都發過豬頭，點可能有高球會結業呢？而更匪夷所思的，係依班苦主竟然係搵涂謹申鳴冤，跟住涂謹申又走去要求中聯辦介入添。點睇都係 fake news 啦下話。

再想一層，都唔係冇可能，除非個經營者同班苦主係廢青。大灣區發展咁好的機會都抓唔緊的，除左冇競爭力、唔肯學普通話的港獨廢青仲會係咩人？而根據「搵錢交稅買樓=對社會有貢獻」的香港特殊相對論，依班做生意蝕錢的人肯定係對社會冇貢獻的人渣敗類拆白黨死飛仔，唔排除佢地將來仲會在中聯辦門口瞓街抗議，順便溝女。

但更令我覺得豈有此理的，係深圳政府對高球會結業竟然沒有伸出援手。高球會對一個城市發展係幾咁重要，深圳政府到底諗乜？娜唔好話咩深圳仲有其他高球會，或者依家大灣區一小時生活圈去遠少少都得呀。阿水都知高球會係地位象徵，亦係商界秘交之地，仲可以培育世界級運動高手，神聖不可侵犯，冇左就 this city will be dying，經濟社會市民健康同時崩潰被深圳追過玩L完云云，一個都不能少架嘛。

再睇多次報道以確認我冇睇錯，報道竟然話高球會結業係因位處水塘隔離，深圳政府勒令要恢復成郊野公園。要郊野公園都唔要高球會？你個深圳政府真係蠢過隻豬，定係全心整死深圳？你望下香港，正確之選梗係要高球會唔要郊野公園架嘛。深圳簡直倒行逆施，違反人類常理，天地不容。另一篇報道話唔止依個，另一個高球會都面臨被深圳政府徵地拎黎再規劃。我直頭怒髮衝冠憑欄處，咒罵佢黃天擊殺死全家。

只許州官英國護照 不許百姓英文提問

早排「特金會」已經慨嘆過，政府同親中派自己冇國際視野，將香港由「國際都會」降格成「大灣區城市」，依家又要嘆多次了。咪因為林鄭話講英文「餵屎貪」(waste time) 囉。

其實眾所周知，香港好多外國人或前外國人定居架嘛，例如林鄭佢屋企人啦，Package Lau、陳智思、陳啟宗、梁君彥、薑融啦，仲有「范婦人」同「豬姐」等等，多不勝數，未能盡錄。唔用英文，略有歧視之嫌囉。

就算唔講係咪歧視，我怕開左個頭講英文係「餵屎貪」，遲D印英文文件係唔環保，路牌印英文係晒位，地鐵英文廣播又"ar"時間，請英國法官又晒人工，甚至學校英文堂都係「餵屎貪」。反正親中派咁唔中意英國法官，正好藉機將佢地炒魷。政府咁中意洗我地香港細路的腦，一於將英文堂改晒做習思想堂。

有朋友問，如果CCTV記者要林鄭用普通話又係咪「餵屎貪」。咁就梗係唔係啦。時代唔同嘛，轉左老細嘛，「國際都會」變左「大灣區城市」嘛。以前殖民地時代，識英文唔識中文就係高等華人，依家變左識普通話唔識廣東話至係高等嘛。我估林鄭遲早話用廣東話係「餵屎貪」，索性全部答問用普通話，等習總開CCTV時聽得到嘛。

我仲諗到一招，就係出動張建宗。皆因張建宗的普通話同廣東話係一樣的，出動佢就可以同時滿足晒普通話同廣東話記者了，幾方便呢。不過學某電視台記者話齋，政府同親中派唔好講咁多廢話就最唔「餵屎貪」了。