窮得只剩下博士銜頭

據說最近流行攻擊別人沒有博士銜頭、研究被引用次數不多、年紀輕。這可能是來自中國傳統吧，向來對學者或知識份子，即「士人」，看得高人一等，又愛敬老尊賢。但仔細一想，博士和年紀大講的說話就較權威，這道理何在呢？

現代社會學鼻祖 Max Weber (1864-1920)曾寫過文說，他認為「權威」(authority) 有3種來源：

1. 魅力型權威 charismatic authority，即憑感情的
2. 傳統型權威 traditional authority，憑「循例、以往都是這樣」的
3. 法理、理性型權威 legal (or rational) authority，是憑理性分析的

在現代受啟蒙的社會，權威應該是以理性型為主，大家憑理性討論分析，判斷一件事是否可信。但實際上魅力型和傳統型權威仍然很多，而且會將自己包裝成理性型權威。例如博士和長者，好像是理性型權威，他們應該是讀更多書有更多社會經驗，應該懂得較多。但實際上很多人是憑博士和長者這個身分去壓倒別人，多於憑知識和理據去辯倒別人。如果知識和理據是正確的，那應該不論講者的身份，即使你不提自己是博士和年紀多大，都是正確的，不是嗎？一來就用博士銜頭和年紀去「撻」人，憑這兩種身份予人的權威感去壓倒別人，實際論述內容和理據卻亂講一通蒙混過去，就是傳統型權威包裝成理性型權威，是反智和反理性的倒退表現。

再想一層，博士真的就是較博學嗎？

現實中，博士和學者的工作通常是限在某一科目，甚至是專研該科目中的某一議題。以我讀的政治學為例。最基本可以分比較政治、國際關係、政治哲學等幾個範疇。然後比較政治之內又可以分單一國家政治、比較政治制度、比較政治文化、比較政黨、比較選舉等。比較選舉又可以分單議席單票制、比例代表制、多議席單票制、排序複選制、混合制等。研究比例代表制，又可以分荷蘭比例代表制 (全國單一選區)、瑞典比例代表制 (調整議席)、希臘比例代表制 (額外議席)、比利時比例代表制 (開放式名單)......其實可以窄到不能再窄。真的符合一般人印象中博學多才的學者，恐怕是少數。

如果你叫一個只研究荷蘭比例代表制的人，評論日本眾議院和參議院的分別，可能已經超出他的研究範圍了，再要他評論公民抗命理論、經濟甚至醫學的，有自知之明的學者，是應該會拒絕評論的，或者表明，他的評論不是基於他學者的身分和研究所作的。

但有些人就是沒自知之明，或者是故意的，信口開河，沒查證過就說出口，總之就是要威，還愛搬博士銜頭出來「撻」人。好像我以前都寫過，看報紙有前大學政治系主任寫的文，連美國英國有幾多黨這些 facts 都可以寫錯，政治理論也是胡亂套用，跟現實根本不符，真是影衰了「政治學者」這銜頭。有這樣的人，就不要怪外界對這些身分越來越不尊重。

[閒聊] 港大‧父子‧對話‧續

昨晚吃飯爸爸又講起港大

爸「細佬，我諗落，發覺你講得真係岩」(*我有個阿哥，不在場)

我「講緊邊樣？」

爸「我自以為認識果D人，王易鳴又好，陳坤耀又好，佢地唔會咁無恥，但我睇錯晒，反而你地就睇岩左。我以為認識佢地，其實我係最不認識佢地」

我「咁...都...正常既，你見到佢地果陣，唔會講D咩政治野架嘛，咪都係傾D濕碎野」

爸「都係」

我「陳坤耀你都識？冇咩聽你講過」

爸「佢係我大學 tutor」

然後講了一些陳坤耀私生子的事，之後又講起陳坤耀太太

爸「港大有兩個女人都叫 Rose，一個係陳坤耀老婆，另一個叫楊紫芝...」

我「楊紫芝？好似聽過依個名wor，話佢會做校委」

爸「係？」

我「係呀果日聽同事講起......我搵下先......(拎出iphone上網)，搵到啦，『校委會昨討論兩名委員增補事宜，醫學院榮休教授楊紫芝答應加入校委會，但另一獲邀的港大基金副主席潘燊昌則以未能抽空為由婉拒邀請』」

爸「潘燊昌？我都識佢丫，我地都係明原堂架」

我「嘩真係個個你都識wor」

媽「依個社會識多d人係有用既」

我「唔知啦，有時唔識佢地既人先睇得透，識佢地的反而當局者迷」

[閒聊] 港大‧父子‧對話

前晚食飯，港大校委會剛剛否決了陳文敏做副校的建議，以下是筆者跟我同樣是港大畢業的爸爸的一些對話。內容經斷章取義，斬頭去尾所得，加上我中英文都不好，記憶也有缺失，還可能加鹽加醋以達至節目效果，以下內容或跟實際的有一定出入，請當成純粹是個故事收看。

爸「點可以咁 shameless！」

我「依家既香港就係要咁先上到位嘛」

爸「真係估唔到班人可以咁無恥，明明成班社會精英......反而你一早睇到喎」

我「唔洗我睇啦，蘋果明報通街都寫晒會否決架啦。你話精英，唔係旨意果d李國章，紀文鳳，劉遵義老婆，王易鳴之流真係關心學術自由呀？連陳坤耀都比人列入反對果邊啦」
(*王易鳴的易字上面應有草花頭，但我打不到那個字)

媽「我記得你以前幾欣賞 Rosanna 架，依家？其實佢一向都有d牆頭草架啦！以前我聽佢響立法局講野，講完一大輪都唔知立場係乜！」

爸「金刀梁我都識得架，依家變成咁」

媽「紀文鳳係咪你同學？」

爸「唔係，好似大我一兩屆」

我「都幾好笑，你識得入面咁多人，仲對佢地有幻想，反而我地依d街外人，一早就睇穿晒佢地只係聽中共話」

爸「唉，我都好失望。以前港英年代佢地要上位，我都算幫過佢地」

我「係囉，講起港英，其實左耳話咩去殖民化，我睇就冇需要勒，王易鳴、范太、譚惠珠、羅范，邊個唔係港英餘孽？依家幾聽話，應該話最聽話就係佢地」

之後新聞講馮敬恩爆大獲

我「你頭先話王易鳴講野，聽完都唔知立場係乜，真係中左喎」

爸「咩擔心港大分裂，你地咁做咪搞到港大更加分裂囉！」

之後講到愛國的問題

爸「其實你會唔會覺得自己係愛國呢」

我「睇你點叫愛國啦，我就真係越來越對中國冇信心」

爸「可能年代唔同啦，我地依代人始終都係信中國會進步」

媽「依家好多中國人都會出國讀書，遲d中國人實會有改變既」

我「外國高深教育又點，李國章係啦掛，咪都係咁。丫仲有，梁振英全家都英國讀書添。越愛國，越係去中國化呀」



最後加多兩句，是跟同事的對話

同事「話時話，個洪丕正係咪都係師兄黎」

我「好似係」

同事「唉，拔萃真係出得多___ (兩個字，請自行填入)」